මා කුඩා කාලයේ සිට ම නිර්මාණයක් රසවිදීම වෙනුවට, එය රසවිඳ, ඉන්පසු එහි පසුබිම හා එම කතාව/නිර්මාණය වටා සැඟවුණු කතා හා ප්රවාද පවා අධ්යයනය කිරීමට වැඩි කැමැත්තක් දක්වන පුද්ගලයෙකි. මේ (පසුගිය) මාසයේ මාගේ කාර්යය වුයේ “Thomas Harris” විසින් රචිත නවකතාවල පාදක චරිතය වන “Hannibal Lecter” ගේ චරිතය ගැන වැඩි වැඩියෙන් හැදෑරීම ය. මෙම “හැනිබල් ලෙක්ටර්” යනු සුප්රසිද්ධ හා අතිශය භයානක ඒ වගේම උගත් දාම මිණීමරුවකු වේ. එම කතාවලට අමතරව “හැනිබල් ලෙක්ටර්” හා සම්බන්ධ අනෙකුත් මිණීමරුවන්ගේ කතා ද මෙහි අන්තර්ගත ය. මෙම සියලු අපරාධකරුවන්ව FBI එක හා ඇමරිකානු පොලිස් දෙපාර්තමේන්තු විසින් දඩයම් කරන ආකාරය හා ඒ සමහර ක්රියාන්විත අසාර්ථක වන ආකාරය මෙම කතා මාලාවන්වල මූලික තේමාවයි.
මා සුප්රසිද්ධ ලේඛක “Thomas Harris” විසින් රචිත “Hannibal Lecter” ගේ චරිතය පාදක වුණු නවකතා වන “Red Dragon (1981)”, “The Silence of the Lambs (1988)” සහ “Hannibal (1999)” යන නවකතා කියවා ඇත්තෙමි. නමුත් තවමත් “The Hannibal Lecter Omnibus (2000)” සහ “Hannibal Rising (2006)” යන නවකතා කියවා නැත්තෙමි. ඒ වගේම මේ වයස වනවිට නවකතා කියවීම අතිශය නීරස ක්රියාවක් බව ද පැවසිය යුතු ය.
පසුගිය මාසයේ “Thomas Harris” විසින් රචිත “Hannibal Lecter” ගේ චරිතය පාදක වී නිර්මාණය කරන ලද සියලු (මම සිතමි) චිත්රපට හා ටී වී මාලාවන් ගොනුව නරඹන ලදිමි. එය මනසට තරමක් වෙහෙසකර කටයුත්තක් බව ද සඳහන් කළ යුතු ය. එබැවින් එම වෙහෙස සංසිදවා ගත්තේ BBC නිර්මාණයන් වන David Attenborough ගේ “Planet Earth (2006)”, “Planet Earth II (2016)” හා “Planet Earth III (2023)” ත්රිත්වය නරඹමිනි. මිනිසෙකුට ජීවත්වන්න නම් හා තමා ජීවත්වනවා කියා දැනෙන්න නම් තමන් ආශාකරන ක්ෂේත්රවල ගවේෂණ හා/හෝ පර්යේෂණ කළයුතු යයි මම සිතමි. ඒ පර්යේෂණ පත්රිකා ජනගත කිරීමට පමණක් නොවේ; තමන්ගේ සතුට සහ උද්යෝගය උදෙසා ය.
කෙසේ වෙතත් මම විසින් පසුගිය මාසයේ නැවත වතාවක් පහත සඳහන් Hannibal චිත්රපට ගොනුව නැරඹුවෙමි. ඒවා,
Manhunter (1986),
The Silence of the Lambs (1991),
Hannibal (2001),
Red Dragon (2002) සහ
Hannibal Rising (2007) වේ.
සැබවින්ම ඒවා නම් සුපිරි නිර්මාණයන් බව කිව යුතු ම ය. මේවායේ රංගනයන් සඳහා ලෝක පුජීත රංගධරයෙකු වන Anthony Hopkins සහ ඔහු හා තකට තක හෙවත් කරට කර රංගනයෙන් දායක වන Jodie Foster, Julianne Moore, Edward Norton, Ralph Fiennes යන නළු නිළි කැළ ගැන සඳහන් නොකළ හැකි ද ?
එපමණක් නොව Hannibal ටී වී මාලාවන් ගොනුව ද මම විසින් නැරඹුවෙමි. ඒවා,
Hannibal Season 1 : කතාංග 13 (2013),
Hannibal Season 2 : කතාංග 13 (2014),
Hannibal Season 3 : කතාංග 13 (2015) සහ
Clarice Season 1 : කතාංග 13 (2021) වේ.
සැබවින්ම ඒවා ද සුපිරි ම සුපිරි නිර්මාණ බව කිව යුතු ම ය. Hannibal ටී වී නිර්මාණ සඳහා Mads Mikkelsen සහ Hugh Dancy ගේ රංගන දක්ෂතා මෙන්ම, Clarice ටී වී නිර්මාණය සඳහා Rebecca Breeds ගේ රංගන දක්ෂතා කෙසේ වචනවලට පෙරලමි ද ?
මෙවැනි සුන්දර නිර්මාණයන් රසනොවිඳින දෑස් මිනිසුන්ට පිහිටනුයේ මුහුණේ පාලුවට පමණක් ම නොවේ දැ යි මට නම් සාධාරණ ලෙස ම සැක සිතේ.
මහාචාර්ය ප්රසන්න මධුරංග ප්රනාන්දු
භෞතික විද්යා අධ්යයනාංශය,
ශ්රී ජයවර්ධනපුර විශ්වවිද්යාලය.
***************************************************